Haust 2024
Rannsóknasjóður meistaranema
Um sjóðinn
Umsóknir
Mat á umsóknum
Frekari upplýsingar
Rannsóknasetur skapandi greina auglýsir rannsóknastyrki til meistaranema. Umsóknafrestur er til 15. nóvember 2024.
Styrkirnir eru ætlaðir meistaranemum sem vinna lokaverkefni um atvinnulíf menningar og skapandi greina og þau fjölþættu og fjölbreyttu samfélags- og efnahagsáhrif sem þessi starfsemi leiðir af sér. Umsækjendur þurfa að stunda meistaranám við viðurkenndan háskóla, hvort sem er á Íslandi eða erlendis, og verkefnið þarf að fjalla um eða hafa tengingu við íslenskt samfélag.
Til úthlutunar núna eru 1,2 milljónir króna og áætlað að styðja 2-3 meistaraverkefni. Miðað er við að fyrir 60 ECTS eininga verkefni sé styrkupphæð 800 þúsund krónur og 400 þúsund krónur fyrir 30 ECTS einingar. Fyrsta úthlutun fór fram í apríl 2024.
Umsóknafrestur fyrir aðra úthlutun er 15. nóvember næstkomandi (athugið að umsóknafrestur var upphaflega auglýstur 14. september en svo framlengt). Umsóknum skal skilað til Rannsóknaseturs skapandi greina með tölvupóstsendingu á rssg@rssg.is. Í umsókn skal koma fram nafn umsækjenda, háskóli, námsleið, einingafjöldi meistaraverkefnis, vinnuheiti verkefnis, leiðbeinandi (ef það liggur fyrir), rannsóknaáætlun og greinargóð lýsing á verkefninu, markmiðum þess og hvernig það tengist atvinnulífi menningar og skapandi greina. Þá skal gera grein fyrir hvernig umsækjandi hyggst ráðstafa styrknum, s.s. með fjárhagsáætlun. Með umsókninni skal fylgja ferilskrá, staðfesting á skólavist og yfirlit yfir námskeið og einkunnir umsækjanda. Umsóknum skal skila á íslensku eða ensku.
Rannsóknasetri skapandi greina er heimilt að kalla eftir nánari upplýsingum og gögnum frá umsækjendum eftir því sem þurfa þykir. Stjórn setursins er heimilt að hafna öllum umsóknum sem ekki tengjast atvinnulífi menningar og skapandi greina eða uppfylla að öðru leyti ekki þær kröfur sem gerðar eru til verkefna.
Stjórn Rannsóknaseturs skapandi greina metur umsóknir og tekur ákvörðum um styrkveitingu. Við mat á umsóknum er litið til eftirfarandi þátta:
tengsl verkefnis við atvinnulíf menningar og skapandi greina og rannsóknaráherslur RSG
möguleikar á hagnýtingu
nýnæmi verkefnis
gæði umsóknar (skýr markmið, vönduð rannsóknaráætlun og hnitmiðaður texti).
Rannsóknasetur skapandi greina var stofnað árið 2023. Stofnaðilar eru Háskólinn á Bifröst, Háskóli Íslands, Háskólinn á Akureyri, Listaháskóli Íslands og Háskólinn á Hólum. Stjórn setursins skipa fulltrúar háskólanna fimm, auk fulltrúa frá Samtökum skapandi greina og menningar- og viðskiptaráðuneyti.
Umsækjendur fá sendan tölvupóst þar sem greint er frá niðurstöðu úthlutunar.
Frekari upplýsingar og ráðgjöf veitir Gunnhildur Einarsdóttir, gunnhildure@rssg.is.